Plantun de Prouvènço

Pèr coumpara dos planto d'encò nostre

Dianthus furcatus & Ranunculus repens

Dianthus furcatus

Caryophyllaceae

Nom en français : Oeillet fourchu.

Descripcioun :
Aquesto girouflado trachis dins li tepiero seco ensouleiado subretout dis Aup marino e dis Aup interno fin qu'à 2400 m. La planto a ges de péu e nimai li petalo. Se recounèis à si bratèio d'epicalice longo e pounchudo, mai que pougnon pas. Li fueio porton de pichòti dènt.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 15 à 60 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Dianthus
Famiho : Caryophyllaceae

Ordre : Caryophyllales

Coulour de la flour : Roso
Petalo : 5
Ø (o loungour) flour : 2 à 2,4 cm
Flourido : Printèms - Estiéu

Sòu : Si
Autour basso e auto : 200 à 2400 m
Aparado : Noun
Jun à avoust

Liò : Tepiero seco
Estànci : Mountagnard à Subaupen
Couroulougi : Ouroufito-Aupenco-Sud-Ouèst
Ref. sc. : Dianthus furcatus Balb., 1804

Crèbo-biòu

Ranunculus repens

Ranunculaceae

Àutri noum : Auriflam, Gros-boutoun-d'or.

Nom en français : Renoncule rampante.

Descripcioun :
Lou crèbo-biòu, uno meno de gros-boutoun-d'or (Var) trachis dins li relarg umide, èi pèr acò qu'èi pas toujour, au nostre, uno planto coumuno. Se recounèis à si fiéu (estouloun) que podon faire fin qu'à 2 mètre de long e que s'enracinon (fotò). Li sepalo rèston contro li petalo e lou fru èi lisc.

Usanço :
Coume tóuti li ranouncle, es uno planto empouisounanto, tambèn pèr li bèsti (crèbo-biòu). Pamens un cop seco o couito, l'anemonino caupudo èi trasfourmado e pu toussico. Se dis qu'èro manjado cuecho di tèms de carestié.